في البداية عايزين نعرف إيه هي خطوات تنظيف البشرة بشكل عام؟
ـ غسيل البشرة بالغسول الخاص بها أو صابون طبي حسب نوع البشرة.
2 ـ استخدمي (تونيك)؛ لأنه بيعمل على التوغّل في مسام البشرة.
3 ـ ابدئي بمرحلة الصنفرة عن طريق عمل "الإسكراب" للبشرة، وده فايدته إنه بيزيل الطبقة الميتة من على سطح البشرة.
4 – استخدمي ماسك مناسب لنوع البشرة.
إزاي أحمي البشرة من أضرار أشعة الشمس؟
بتعتبر الفترة من الساعة 12 إلى الساعة 3 هي أكثر فترة بتكون فيها أشعة الشمس ضارة على البشرة.. علشان كده دايماً بننصح أي بنت هتتعرض لأشعة الشمس في الفترة دي إنها تستخدم كريمات عازلة مكونة من (SPf)؛ لأن بها مادة تحمي البشرة من أشعة الشمس، وبها درجات حماية مختلفة حسب نوعية وحساسية كل بشرة.
إيه هو الماسك الطبيعي المناسب للبشرة الدهنية؟
ماسك البشرة الدهنية مكوناته (عصير خيار + ملعقة ماء ورد + ملعقة زيت زيتون + ملعقة دقيق) اخلطيهم كلهم مع بعض وحطيهم على وشك لمدة عشر دقائق، وبعد كده اشطفي وشّك بالماء الفاتر ثم الماء البارد.
أو ماسك "طمي البحر الميت"؛ لأن البحر الميت به نسبة أملاح ويود عالية جدّاً ويعالج أيضا حب الشباب.
والماسك الطبيعي للبشرة الجافة إيه؟
البشرة الجافة أكثر عرضة لعلامات الشيخوخة فلا بد أن نهتم بترطيبها، والماسك المناسب لها يتكون من (ملعقة دقيق + ملعقة جلسرين + ملعقة عسل + أرز مطحون + 4 ملاعق لبن) نخلطهم مع بعض ونضعهم على الوجه لمدة سبع دقائق، وبعد كده نشطف الوجه بالماء الفاتر ثم الماء البارد.
وفيه ماسك تاني مناسب برضه للبشرة الجافة مكوناته هي (ملعقة خميرة + عسل + 2/1 ملعقة زيت زيتون + ملعقة خل تفاح + ملعقة دقيق) نخلطهم مع بعض ونضعهم على الوجه لمدة سبع دقائق، ثم يغسل بماء فاتر ثم ماء بارد.
وإيه هو الماسك المناسب قبل وضع الماكياج مباشرة؟
مكوناته هي (صفار بيضة + زيت اللوز الحلو + قشر ليمون + ماء ورد + عسل + زبدة + دقيق + لبن) تخلطيهم على بعض وتحطيهم على الوجه لمدة ربع ساعة، وبعد كده تغسلي وشّك بالماء الفاتر ثم البارد.
وإيه الماسك الخاص لشد التجاعيد وشد الترهّلات؟
ده ماسك مهم جدّاً خاصة للبنات اللي بتعاني من ظهور التجاعيد مبكراً، ومكوناته هي (لب تفاحة + ملعقة نشا نذوبها في 2 ملعقة لبن + زيت زيتون + ملعقة دقيق) تخلطيهم كلهم مع بعض، وبعد كده تحطيهم على الوجه لمدة عشرة دقائق، ثم يغسل الوجه بماء فاتر ثم بماء بارد.
وإيه علاج البشرة اللي بتعاني من الشحوب؟
دي كمان ليها ماسك مكوناته هي (2 ملعقة خيار + 2 ملعقة ماء ورد + ملعقة بودرة حليب + ملعقة زيت زيتون) تخلطي كل المكونات دي مع بعض، وبعد كده تحطيهم على وشك لمدة عشرة دقائق، وبعد كده تغسلي وشّك بالماء الفاتر ثم البارد.
بنات كثيرة عايزة يكون لون بشرتها محمرّ زي الورد تعمل إيه؟
تستخدم ماسك مكون من (عصير ثلاث جزرات + 2 ملعقة عسل + ملعقة زيت زيتون + زلال بيضة + 4/1 حبة طماطم + 2 ملعقة دقيق) تخلطيهم مع بعض، وبعد كده تحطيهم على وشك لمدة عشر دقائق، وبعد كده يغسل الوش بالماء الفاتر ثم الماء البارد.
البشرة المختلطة الماسك المناسب لها إيه؟
(زلال بيضة + 2/1 ملعقة ليمون + 2 ملعقة بطاطس مهروسة + ملعقة عسل + ملعقة نشا) ونخلطهم مع بعض، وبعد كده نحطه على الوجه لمدة سبع دقائق، ثم يغسل الوجه بماء فاتر ثم ماء بارد. فهذا الماسك يساعد على أن البشرة تعمل لها نوعا من التوازن وتعادل توزيع الدهون.
الماسك الخاص بتفتيح البشرة الداكنة إيه؟
(ملعقة دقيق + ماء ورد + 4/1 ملعقة زيت خروع + ليمون + 2 ملعقة نشا مذوبة في لبن) تخلط المقادير دي كلها مع بعض، وبعد كده توضع على البشرة لمدة سبع دقائق، وبعد كده تغسل البشرة بالماء الفاتر ثم البارد.
بنت عندها مناسبة فجأة وعايزة ماسك سريع لتفتيح ونضارة البشرة؟
تستخدم ماسك مكون من (حبة بطاطس مهروسة + 2 ملعقة لبن + ملعقة نشا + ثلاث ملاعق دقيق ذرة + 4\1 ملعقة زيت زيتون + 4 ملاعق ماء أرز مسلوق) تخلط المقادير دي كلها مع بعضها وتضعهم على الوجه لمدة عشر دقائق فهذا الماسك يعمل على تفتيح البشرة بسرعة ومحاربة التجاعيد.
ماسك للقضاء على السواد تحت العين؟
باكيت شاي بعد غليانه ثم يترك على العين لمدة 15 دقيقة، ثم يغسل الوجه بماء فاتر ثم ماء بارد.
أو (ملعقة نشا + ماء ورد + خميرة بيرة + لبن + زيت لوز + عصير خيار) وتخلط المكونات على قطعة شاش وتوضع على الوجه لمدة عشر دقائق.
وازاي أعالج تشقق الشفايف؟
(2 ملعقة فازلين + 4/1 ملعقة زيت زيتون) يوضع هذا الخليط على الشفايف كل يوم قبل النوم.
الماسك الطبيعي لعلاج تشقق الكعبين إيه؟
(ملعقة زيت زيتون + ملعقة فازلين + ملعقة زيت أطفال) ونخلطهم جميعا ونضعهم على القدم، ثم نرتدي كيس أو شراب قبل النوم.
إزاي أعمل كريم صنفرة في البيت؟
(دقيق + قشر ليمون + قشر برتقال + ماء + صفار بيض) وأخلطهم مع بعض وأضعهم على الوجه لمدة عشر دقائق.
فيه ماسكات كثيرة جدّاً والبنات محتارة بينهم تعمل إيه؟ وهل يجب أن أغير الماسك من فترة إلى أخرى؟
ـ لا بد أن البنت تتعرف على نوع بشرتها في البداية.
2 ـ لا تستعجل على نتيجة الماسك. فالنتيجة تأتي بعد مرات عديدة.
3 ـ أي ماسك موجود به نوع من الغذاء أحاول أن أقوم بتناول هذا الغذاء باستمرار ويجب أن أنوع في طرق الماسكات من فترة إلى أخرى حتى تعطي نتيجة إيجابية.
